ଗଛମୂଳରେ ପୂଜା ପାଉଥିଲେ ଶିବ ଓ ବୃଷଭ । ପୂଜା ବେଳେ ପୂଜା କରୁଥିବା ମହିଳା ଦେଖିଲେ ଯେ ପଥର ଷଣ୍ଢ ପାଣି ପିଉଛି । ପରେ ଖବର ଶୁଣି ଲୋକେ କ୍ଷୀର ମଧ୍ୟ ପିଆଇଲେ । ଆଉ ଏହି ଖବର ପ୍ରଚାରିତ ହେବା ପରେ ଭଦ୍ରକ ଜିଲ୍ଲା ତିହିଡି ଗୁଡପାଳ ଗାଁରେ ଲୋକଙ୍କ ସୁଅ ଛୁଟୁଛି ।
ଗାଁର ଏକ ଗଛମୂଳରେ ପୂଜା ପାଉଥିବା ଶିବଙ୍କ ପାଖରେ ରହିଛି ପଥର ନିର୍ମିତ ବୃଷଭ । ସନ୍ଧ୍ୟା ସମୟ ରେ ପୂଜା କରୁଥିବା ଜଣେ ମହିଳା ପଥର ବୃଷଭ ନିକଟରେ ହାତ ଆଞ୍ଜୁଳିରେ ପାଣି ଦେଇଥିଲେ । କିଛି ସମୟ ମଧ୍ୟରେ ଆଞ୍ଜୁଳାଏ ପାଣି ସାରିଯାଇଥିଲା ।ଏହା ଦେଖି ସେ ଆଶ୍ଚର୍ଯ୍ୟ ହୋଇଯାଇଥିଲେ । ଏହି ଖବର ଗାଁ ଲୋକେ ଜାଣିବା ପରେ ଗାଁ ଲୋକଙ୍କ ଭିଡ ଜମି ଯାଇଥିଲା ସେହି ସ୍ଥାନରେ ।
ଅନେକ ଲୋକେ ଏହି ଘଟଣାକୁ ଅଲୌକିକ ଓ ଐଶ୍ବରିକ ଶକ୍ତି ବୋଲି ଭାବିଲେଣି । ଦୂର ଦୁରାନ୍ତରୁ ଲୋକେ ଗୁଡ଼ପାଳକୁ ଯାଇ ପଥର ବୃଷଭକୁ ନିଜ ହାତରେ ପାଣି ପିଆଉଛନ୍ତି । ଲୋକେ କ୍ଷୀର ଓ ପାଣି ନେଇ ପଥର ଶିବ ଙ୍କ ମୁହଁ ନିକଟ ରେ ରଖୁଛନ୍ତି । ତେବେ କିଛି ସମୟ ମଧ୍ୟ ରେ କ୍ଷୀର ସବୁ ଚାମଚ ରୁ ସରିଯାଉଥିବା ଦେଖିବା ପାଇଁ ମିଳୁଛି । ତେବେ ଏହିଠାରେ ଏକ ମନ୍ଦିର ପ୍ରତିଷ୍ଠା ପାଇଁ ଗ୍ରାମବାସୀ ଅଣ୍ଟା ଭିଡ଼ିଲେଣି ।
ଏହି ଘଟଣା ପଛ ର କାରଣ ଅଲୌକିକ ହେଉ କି କୌଣସି ବୈଜ୍ଞାନିକ କାରଣ , କିନ୍ତୁ ଲୋକେ ଏବେ ମନ ରେ ଆଶା ବାନ୍ଧିଛନ୍ତି ଯେ ଏଠାରେ ଠାକୁର ବିଦ୍ୟମାନ ଅଛନ୍ତି । ମହାଦେବଙ୍କ ଆବିର୍ଭାବ ହୋଇଛନ୍ତି ବୋଲି ଗାଁରେ ଶୁଣିବାକୁ ମିଳୁଛି । ଗତ କିଛିଦିନ ତଳେ ଗଜପତି ଜିଲ୍ଲାର ମୋହନା ଅଞ୍ଚଳର ଏକ ଦୁର୍ଗମ ପାହାଡ ଅଞ୍ଚଳରେ ସ୍ବପ୍ନାଦେଶ ଦେଇ ଫୁଟି ଶିବଲିଙ୍ଗ ମିଳିଥିଲା । ବିଶେଷ କରି ଶ୍ରାବଣ ମାସରେ ଏହି ଅଲୌକିକ ଘଟଣାକୁ ନେଇ ସବୁଠି ଚର୍ଚ୍ଚା ।
0 Comments
Please do not enter any Spam Link in the comment Box ,